Unua paĝo
Nia teamo
Kontaktoj
Pri ni

    ĉefpaĝo


La’o Hamutuk Institutu Timór-Leste ba Monitór no Analiza Dezenvolvimentu

Elŝuti 13.17 Kb.

La’o Hamutuk Institutu Timór-Leste ba Monitór no Analiza Dezenvolvimentu




Dato15.10.2017
Grandeco13.17 Kb.

Elŝuti 13.17 Kb.

La’o Hamutuk

Institutu Timór-Leste ba Monitór no Analiza Dezenvolvimentu

Rua Martires dos Pátria, Bebora, Dili, Timór-Leste

Tel : +670 3321040 no +670 7234330

Email : info@laohamutuk.org

Website : www.laohamutuk.org Blog: www.laohamutuk.blogspot.com

Dili, 15 Juñu 2012

Bodik ba : Partidu Polítiku sira.

Asuntu : Perguntas husi La’o Hamutuk ba partidu polítiku tomak

Ho Respeitu,



La’o Hamutuk nudár institutu Timór-Leste ba monitor no analiza dezenvolvimentu ne’ebé eziste dezde 2000 ho objetivu atu fasilita komunikasaun entre povo no nia ukun-na’in sira ho hanoin katak povo Timór-Leste tomak mak tenke sai autór ba nia prosesu dezenvolvimentu rasik.

Iha kampaña Prezidensial liu ba, La’o Hamutuk fahe perguntas ba kandidatu Prezidente Repúblika sira atu prense, ami hetan resposta husi sira no publika iha ami nia website http://laohamutuk.org/misc/eleisaun2012/PerguntaKaprezTe.htm no iha jornál lokál ida. Nune’e iha kampaña eleitorál ida ne’e, ami kontinua tan atu esplora vizaun no estratéjia polítika husi ita-boot sira nia partidu ba tinan lima oin mai. Nune’e, liu husi karta ida ne’e ami hakarak fahe perguntas balu relasiona ho situasaun ekonomia, sosiál, polítika no direitus umanus ba ita-boot sira atu bele responde.

Hare asuntu sira ne’e importante teb-tebes ba ukun-na’in sira hotu atu tau atensaun, no fó responsabilidade . Ami espera katak ita-boot sira sei fó resposta, hodi nune’e bele ajuda eleitor sira atu deside sira nia votu nudár parte husi edukasaun votantes, no direitu polítiku ida ba sira atu hatene polítika saida mak ita-boot sira sei halo bainhira eleitu.

Resposta sira ne’ebé ami hetan, sei publika iha ami nia website no mós ba media seluk molok 21 Juñu 2012.

Aleinde liu husi questionnaire ida ne’e, karik ita-boot sira laiha tempu atu prense, ami mós prontu atu halo entrevista direita ho gravasaun, no uza de’it saida mak Ita-boot sira ko’alia sein aumenta. Ba konfirmasaun, bele kontaktu +670 7289241 ka email atino@laohamutuk.org.

Mak ne’e de’it ami nia karta, ba kolaborasaun tomak husi ita-boot sira, la haluha ami hato’o obrigadu wain.

Ami saran lian,

Celestino Gusmão


Reprezentante Ekipa Koordenasaun, Lao Hamutuk.

PERGUNTAS BA PARTIDO POLITIKU SIRA MAK TUIR MAI NE’E:


  1. Durante tinan lima kotuk ne’e, metade ekonomia lokál no besik atividade estadu nian tomak mai husi reseitas petrolíferu. Kampu Bayu Undan no Kitan ne’ebé durante ne’e fó reseitas ba Timór-Leste sei maran iha tinan 12 oin mai. Polítika saida mak ita-boot nia partidu sei trasa atu hasa’e ekonomia Timór-Leste no sustenta finansas estadu bainhira mina-rai sei maran?

  2. Hafoin estabelesimentu Fundu Petrolíferu, gastus estadu nian mai husi Fundu Petrolíferu sa’e maka’as tinan-tinan. Lei Fundu ne’e fó matadalan ba Rendimentu Sustentável Estimadu (RSE 3%) atu limita foti osan husi Fundu, maibé infelizmente gastus durante ne’e husi Fundu seidauk respeita matadalan ne’e. Iha tinan 2012 Timór-Leste foti osan husi Fundu dupla tiha liu RSE 3%. Karik eleitu, ita-boot sira sei respeita Rendimentu Sustentável Estimadu ka lae?

  3. Durante ne’e iha debate maka’as kona ba planu dezenvolvimentu kampu gas Greater Sunrise. No tinan oin CMATS Treaty tama ona iha nia prazu, polítika saida mak ita-boot sira nia partidu sei halo atu ajuda Timór-Leste hodi negosia fronteira maritima ho Indonézia no Australia? Karik eleitu, saida mak ita boot sira nia partidu nia estratéjia atu dezenvolve kampu Greater Sunrise?

  4. Daudauk ne’e, Timór-Leste gasta maka’as ba projetu indústria petróleu Tasi Mane iha Kosta Súl duke investe iha agrikultura, indústria ki’ik no setór seluk ne’ebé sustentável liu. Ita boot nia partidu hanoin ida ne’e di’ak ba Timór-Leste nia futuru?

  5. Daudauk ne’e, Timór-Leste investe uitoan de’it ba iha edukasaun no saúde kompara ho nasaun sira seluk. Ita boot nia partidu hanoin ne’e di’ak atu kontinua prioridade ida ne’e?

  6. 2012 nudár tinan primeiru ba Timór-Leste atu halo dívida públiku husi rai-li’ur. Governu asina ona kontratu deve tokon $103 husi Japaun no ADB, no iha intensaun atu deve tokon $380 tan. Karik Timór-Leste implementa duni Planu Estratéjiku Dezenvolvimentu Nasionál, ita sei presiza empresta besik biliaun. Ita-boot sira nia partidu konkorda atu halo empréstimu ba nasaun iha futuru ka lae? Oinsá ita bele selu fila fali tusan bainhira Fundu Petrolíferu no rezerva petróleu maran tiha?

  7. Relatóriu CAVR “Chega!”, KPP-HAM Indonézia, Komisaun Peritus ONU nia rekomenda atu kria Tribunál Internasionál hodi julga autór krime kontra umanidade iha Timór-Leste husi tinan 1975-1999, bainhira prosesu justisa iha Timór-Leste no Indonézia falla. Maibé, autór sira ne’e seidauk ba hatán iha tribunál no balun nafatin kontinua kaer ukun iha Indonézia. Polítika saida mak ita nia partidu sei halo atu hakotu impunidade ba krime pasadu?

  8. Okupasaun Indonézia iha Timór-Leste halakon ema barak ho obrigatóriamente. Ita-boot sira hanoin katak Timór-Leste bele ratifika Konvensaun Internasionál ba Ema Lakon (International Convention for the Protection of All Person from Enforced Disappearance) ka lae?

  9. Korrupsaun nudár obstákulu boot ba dezenvolvimentu povo, liu-liu nasaun hanesan Timór-Leste ne’ebé nia ekonomia depende ba rendimentu petrolíferu, fasil liu atu monu iha situasaun ne’e. Polítika saida mak ita-boot sira nia partidu sei halo atu ajuda Institutu, Empreza no Administrasaun Públiku sira bele promove transparénsia, check and balance, akuntabilidade no prevene husi korrupsaun?

  10. Daudauk ne’e Timór-Leste iha esforsu boot atu sai membru ASEAN, maibé infelizmente iha estadu ASEAN balu sei iha konflitu no komete violasaun direitus umanus, hanesan iha Burma no Papua Barat. Polítika saida mak ita-boot nia partidu sei trasa atu ajuda hodi hamenus violasaun direitus umanus iha ASEAN laran?

  11. Eis Prezidente Ramos-Horta hafoin vetu ba lei tolu kona-ba asesu ba rai tanba nia hare lei sira nee la fó benefísiu ba povu ki’ik. Karik eleitu, polítika saida mak ita-boot sira sei halo atu ajuda povo ki’ik sira hodi haforsa direitu ba asesu ba rai?

  12. Durante dékada ikus ne’e, prioridade estadu atu dezenvolve setór agrikultura menus liu kompara ho projetu infrastrutura sira. Ita-boot sira hanoin Timór-Leste bele kontinua nafatin hanesan ne’e ba futuru?

  13. Tinan-tinan, Timór-Leste importa aihan husi rai-li’ur, polítika ne’e hamate abilidade atu kuda aihan no hamenus produsaun. Polítika saida mak ita-boot sira nia partidu sei halo atu hamenus importasaun no maximiza produsaun lokál?



Elŝuti 13.17 Kb.

  • Dili, 15 Juñu 2012 Bodik ba : Partidu Polítiku sira. Asuntu : Perguntas husi La’o Hamutuk ba partidu polítiku tomak
  • PERGUNTAS BA PARTIDO POLITIKU SIRA MAK TUIR MAI NE’E

  • Elŝuti 13.17 Kb.